Jenevada mayınğa qarşı faaliyet meseleleri milliy müdirler ve BMT mesleatçılarınıñ 28-nci halqara körüşüvi çerçivesinde ötkerilgen qoşma tedbirde ukrayin eyyeti taqdimnamelerden birinde hata olğanını qayd etti: Qırım yarımadası Rusiye toprağınıñ bir parçası olaraq qayd etilgen edi.
Ukrayina Tış işler nazirligi haber etkenine köre, ukrayin tarafınıñ kirişmesinden soñ hata tüzetilgen.
Global Protection Cluster teşkilâtı tezden resmiy saytında haritanı yañartqan ve böyle adiselerniñ tekrarlanmaması içün kerekli tedbirlerni almağa vade etken.
"Suveren ve mustaqil Ukrayinanıñ sıñırları toqunılmaz. Ortaqlarımızğa tez ve ciddiy areketleri içün teşekkürler bildiremiz. Ukrayina dünya haritalarında er vaqıt doğru kösterilmesi içün çalışmağa devam etemiz", — dep aytıla beyanatta.
Ukrayina devlet organları ve diplomatları bu kibi adiselerge muntazam sürette cevap berip, böyle malümatnı tüzetmege tırışalar.
2014 senesi Rusiye Qırımnı ilhaq etken soñ, Ukrayina ve dünyanıñ çoqusı memleketleri yarımadanı vaqtınca işğal etilgen topraq dep saymağa devam eteler. Halqara uquqqa köre, Qırım Muhtar Cumhuriyeti ve Aqyar şeeri Ukrayinanıñ bir qısmı olıp qala.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
