İlk yaz ayınıñ 5-nde Ukrayina Milliy jurnalistler birliginiñ matbuat merkezinde Jurnalist kününe bağışlanğan "Men jurnalist qorantasındanım" varaqalar seriyasınıñ sergisi ve taqdim merasimi açıldı. Resimlerniñ müellifleri, şu cümleden Rusiye repressiyaları neticesinde zarar körgen ukrayin mediacılarınıñ balaları ve torunlarıdır.
Taqdim etilgen işler arasında RF-da mahküm etilgen Qırım.Aqiqat frilanseri Vladislav Yesipenkonıñ qızı Stefaniyanıñ varaqası bar.
Sergide Rusiye apishanesinde bulunğan qırımtatar cemaat jurnalisti Marlen Asanovnıñ qızı Safiyeniñ de resmi taqdim etilgen.
Stefaniya Yesipenko
"Balalar öz resimlerinde jurnalist zenaatına olğan baqışlarını ifade eteler, qoranta ğururı, büyükler qarşılaşqan qıyınlıqlar, söz ve aqiqatnıñ küçü ve qıymeti aqqında ikâye eteler", — dep aytıla tedbirniñ ilânında.
Apiske alınğan ve elâk olğan jurnalistlerniñ balalarınıñ resimleri. Kıyiv, 2025 senesi
Tedbirniñ moderatorı — NSJU birinci kâtibi Lina Kuşç. Sekiz levhanı teşkilâtnıñ ukrayin jurnalistlerine qoltutqan halqara ortaqlarına berecekler.
Vladislav Yesipenko 2021 senesi saban ayınıñ 10-nda Rusiye mahsus hızmetleri tarafından yaqalanğan edi. Rusiye akimiyeti onı patlayıcı maddeler saqlağanında ve taşığanında qabaatladı, amma aq qorçalayıcılar onıñ taqip etilmesini siyasiy sebeplerden yapılğan dep saya. 2022 senesi Aqmescitteki mahkeme Yesipenkonı 6 yılğa azatlıqtan marum etti. Jurnalist FSB tarafından işkence ve basqığa oğrağanını bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.